مكان فى القلب: زمن ...أزرق

Tuesday, November 27, 2007

زمن ...أزرق

أرب .أرب .ارب .الدنيا تدرب تقلب

على كل لون هتشوف فيها الاحمر فى الأسود

تعالى أرب هنا هتشوف الحمصى والمشمشى

هتشوف ألى عامل أمير وراسم نفسه بالطباشير

هتشوف ألى عايش دور ملك يأمر وينهى بالعجب

هتشوف البوغاشه هتشوف النداشه والبمبى الشفتشى

هتشوف إلى نايم على الحصير وفى حلمه بس بيبقى وزير

هتشوف إلى نفسه زى الدهب والدنئ أبن الخشب

هتشوف ألى بيهرب من لحظه حلوه ودافن عقله جوه التعب

هتشوف ألى لابس توب طويل لجل يدارى من العيون خوفه

أحنا أيه وفين ومين وأنت يا بكره جاى لأيه

# posted by فى القلب @ 2:25 AM

Comments:

أحنا أيه وفين ومين وأنت يا بكره جاى لأيه
***********
التساؤل المعتاد
مين ، وفين ، وليه
***********
زمن
أوكي
ازرق
:)
إلى نفسه زى الدهب والدنئ أبن الخشب
***********
والله يا أوشا بوست مفاجىء
والسطر الأخير مش هيتنسي
***********
وأنت يا بكره جاى لأيه
وأنت يا بكره جاى لأيه
وأنت يا بكره جاى لأيه

# posted by

أحمد سلامــة : November 27, 2007 at 2:55 AM

نسيت اقولك
الميوزك
لاعبة بالالوان فعلا كتير

# posted by

أحمد سلامــة : November 27, 2007 at 2:57 AM

أنتى جميل جدا جدا يا احمد
ليقول لى مستر كافيه كلمات كهذه فيجب أن أحفظها الى الابد فى أعمق خلجات النفس

والميوزك دى شافت النور بفضل حد عذيذ أوىىىىىىى على قلبى هو عارف نفسه
ههههههههه

ربنا يحفظه ويحفظك

# posted by

فى القلب : November 27, 2007 at 4:20 AM

ممكن نسميه ظاهره مهرج لكنه حكيم

# posted by

عصفور المدينة : November 27, 2007 at 7:18 AM

أستذنا أستاذ عصفورالمدنيه

دائما توقيعك له وقع خاص على النفس

يثير الامتنان والاعتزاز
حفظك الله يا أستذنا

# posted by

فى القلب : November 27, 2007 at 9:02 AM

أوشا حبيبتى الغالية

تغييبى تغييبى بس بتطلعى بحاجات محصلتش
بس المرة دى فى الجون فعلا
من ملك لريس لشيخ لأمير لعاهل لقائد
العجينة واحدة بس الشكل مختلف فعلا تفرق فى الالوان بس

حالنا يتعب يا أوشا
يا ترى إحنا مجنى علينا فعلا
ولا إحنا اللى سببنا ده لنفسنا
ربنا يسامحنا ويلطف بينا
و حال العرب يتعدل علشان الأجيال الجاية
إحنا خلاص مش طامعين فى عدله لينا

عبقرية يا اوشا
التحية لكلمتين جابوا الخلاصة فعلا
سلام يا اوشتنا

# posted by

Esmat : November 27, 2007 at 10:04 AM

من أجمل البوستات عندك رائعه والموسيقى المصاحبه تجعلنى اسرح بخيالى فى عمق الكلمات وايضا الصوره التى اختارتيها للبوست معبره جدا
فعلا ماالدنيا الا مسرح كبير على راى الفنان يوسف وهبى وفيها جميع اللوان وجميع الانواع من يلس توب طويل لكى يدارى من العيون خوفه ومن يهرب من اللحظه الحلوه ودافن عقله جوه التعب أحنا أيه وفين وأنت يابكره جاى لايه

بس اكيد مع شروق شمس كل يوم جديد بيتولد يوم جديد وبيتولد معه امل فى كل شىء
كلمات رائعه عجبتنى كتتتتتتتتير واستوقفتنى امامها

تحياتى على ها البوست الرائع واتمنى المزيد من ذلك

# posted by

نبضات : November 27, 2007 at 11:04 AM

بوست رائع بجد

كدا انتي عديتي خلاص وبقيتي زي صلاح جاهين

بجد مبدعه

تحياتي

# posted by

Coca : November 27, 2007 at 12:08 PM

ايه ده انا دخلت صندوق الدنيا:))
ازاى جمعتيها كده فى السطور القليله ده
دا انتى مسبتيش حاجه
ألى بيهرب من لحظه حلوه ودافن عقله جوه التعب
شوفتها كتييييييير
بس بكره لازم هايجى برده

# posted by

همسات دافئه : November 27, 2007 at 12:37 PM

بعد السلام

بكره جاى
ان شاء الله
وبكره خير
ولازم كلنا
نعمل حسابه

تحياتى

# posted by

بتاع العسل : November 27, 2007 at 1:13 PM

عزيزتي أوشا

المقوله الشهيره
ليوسف وهبي
بصوته المعروف
ما الدنيا إلا مسرحٌ كبير
وبما أن الزمن ما بقاش نفس الزمن وكل شىء بيتطور
فلقد أصبحت المقوله
ما الدنيا إلا سيركٌ كبير
فيه الغني جنب الفقير
بس جديده حكاية
إبن الدهب وإبن الخشب
عجبني الوصف قوي
تحياتي

# posted by

loumi : November 27, 2007 at 1:21 PM

أوشا
أنا نازله القاهرة يوم الجمعه
ومش لاقيالك إيميل عشان أبعت لك عليه
حابقا سعيده لو قدرنا نتقابل
تحياتي

# posted by

loumi : November 27, 2007 at 1:25 PM

بوست اكتر من رائع

عجبنى اوى اختصار احوالنا فى السطرين دول

بس اكتر جزء عجبتى

هتشوف إلى نفسه زى الدهب والدنئ ابن الخشب

جميل اوى التعبير ده

سلااااااااااااااام

# posted by

دكتور كسلان : November 27, 2007 at 1:49 PM

يتلون كل الالوان
لكنه فى النهاية بشر
مودتى

# posted by

Desert cat : November 27, 2007 at 4:11 PM

عصمتى حبيبتى
لؤلؤتى المكنونه يا حبيبتى

كيف أغيب وأنتم فى القلب معى أحملكم أينما حط بى الرحال
دمتى لى يا حبيبتى الجميله أيتها الأميره التى ننتظر طلتك البهيه على أرض الكنانه بفارغ الصبر
دمتى لى يا حبيبتى

# posted by

فى القلب : November 27, 2007 at 6:45 PM

نبضات
الرقيقه البريئه النقيه تملكتنى الفرحه عندما أسعدتك الموسيقى
وعندما تتأملين كلماتى هذا مدعاه لفخرى جميلتى
دمتى لى ذكيه ملائكيه

# posted by

فى القلب : November 27, 2007 at 6:47 PM

كوكا
عندما ترانى من تكون فى مثل رقتك و تدفقك و أحساسك وتضعنى فى هذه المكانه فيجب أن أتيه فخرا
دمت لى يا صفيه النفس جميله

# posted by

فى القلب : November 27, 2007 at 6:50 PM

همسات دافئه
يا جميله ومنيره
نعم بكره قادم وبقوه
نحن موجودون لنفعلها يا قمرى
حفظك الله وأدامك

# posted by

فى القلب : November 27, 2007 at 6:52 PM

بتاع العسل
تنيرنى يا بتاع العسل وتملأنى الفرحه بتعليقك المشرق الوهاج
دمت لى يا بتاع العسل

# posted by

فى القلب : November 27, 2007 at 6:53 PM

لومىىىىىىىى

يا خبر أبيض بهيج لا استطيع أن أمنع نفسى من اظهار سعادتى بأن أقابل لومى كت أطير من الفرحه لومى دمتى لى و أراكى على خير يا جميله

# posted by

فى القلب : November 27, 2007 at 6:58 PM

دكتور كسلان
الرائع المتألق وتنيرنى بتعليقك المشع
دمت لى بروعه تألقك دكتور كسلان

# posted by

فى القلب : November 27, 2007 at 7:03 PM

ديزرت كات
تنيرنى أركان المدونه بتعليقك المنير ديزرت كات
ونعم الكل يطلق عليهم بشر

البعض و البعض فقط بشر حقيقيون
دمت لى ديزرت كات

# posted by

فى القلب : November 27, 2007 at 7:06 PM

فكرتينى بأغنية مسلسل قضية رأى عام
السؤال فى كلمتين أحنا مين ولية فين لية بنضحك وأحنا دايما مجروحين

فعلا الزمن اللى أحنا فيه بقى غريب قوى قوى

ربنا يرحمنا

بوست رائع بجد

بس أنا زعلانة منك واكيد إنتى عارفة لية ؟

تحياتى لكى

# posted by

بسمه عبدالباسط : November 27, 2007 at 7:58 PM

إحنا فعلاً عاملين زي المهرجين
، بنطنطط على حبال و مش واقفين على أرض تماما ً بنلف في الهواء ، بوست رائع و و احشانا جداً

# posted by

Mohamed Sakr : November 27, 2007 at 9:21 PM

بعتيلى على اي ميل
انا ميلى اهوة لانى فتحتة مالاقتش حاجة

rohbosbos@gmail.com

# posted by

بسمه عبدالباسط : November 27, 2007 at 10:13 PM

أنا بعت لك ميل فيه رقمى ياريت بقى تبعتيلى رقمك على الميل او على الموبايل وهكلمك بكرة ان شاء الله

سلام

# posted by

بسمه عبدالباسط : November 27, 2007 at 11:09 PM

ازيك يا قمر
بتفكرينى بأغنية مدحت صالح فى فيلم البلياتشو

وعجبى

# posted by

البنت الشلبية : November 28, 2007 at 12:58 AM

جميل اوي

هي الدنيا كده مين يقدر يقول غير كده

رحمتك يااااارب

# posted by

اسكندراني اوي : November 28, 2007 at 5:27 AM

عزيزتى
الزمن ده صعب جدا الواحد احتار بصراحه يعيشه باى لون واى معنى
لو كدب هيزعل ناس لو صدق هيزعل ناس
مش عارف تعيش بلونا ولا نحاول نغيره علشان نرتاح من الناس
اللى بيلون دلوقتى زى اللى مش بيلون كلهم فى سله واحده سله الجرى كلنا بنجرى والله اعلم لما نوصل هنوصل لايه اه كل انسان ليه هدف بس المهم يوصل لهدفه ازاى ده المهم
واجرى يا ابن ادهم جرى الوحوش غير رزقك لم تحوش
فكرتينا بالالوان اللى قبلنا وبنقبلها كل يوم
تحياتى يا افندم
سلام

# posted by

احساس لسه حى : November 28, 2007 at 6:07 AM

بوس بوس

يا جميله بتألق ورقيقه بعفويه

زمنا غريب بينا لازم نقف للغريب نقله

أنت غريييييب وننبه بعض بغربته

ودمتى لى يا قمرى المنير

# posted by

فى القلب : November 28, 2007 at 8:17 AM

هاوك

دائما تعليقك ينيرنى هاوك ويسبب شروق فى نفسى

عارف يا هاوك المهم الناس دى هى ألى تتنطط وأحنا الى نفضل سكنين فى مكنا منبقاش مثلهم
دمت لى يا هاوك بألف ألف خير

# posted by

فى القلب : November 28, 2007 at 8:22 AM

بوس بوس

ما عاش ولا كان ألى يزعل القمر أنا ديما تحت الأمر يا جميله

# posted by

فى القلب : November 28, 2007 at 8:24 AM

البنت شلبيه

يا رقيقه وحساسه ومستشعره بكل شئ حولك
وعلى رأى سى مدحت معاكى حق

دمتى لى يا قمره

# posted by

فى القلب : November 28, 2007 at 8:25 AM

أسكندرانى أوى

يامنير بطبيعتك ومشرق وحساس بتنورنى جدا جدا يا أسكندرانى وتعليقك يزيدنى نور
وهى الدنيا كده هنروحكده هنيجى كده هى الدنياكده

دمت لى يا أسكندرانى بألف صحه وسعاده

# posted by

فى القلب : November 28, 2007 at 8:30 AM

أحساس لسه حى
يا شاعر رقيق مرهف بحساسيه عاليه

الاصل فى أرضاء الله وضميرى وليغضب ما يغضب لا يهمنى

عندما تكون نفسى فى راحه لما افعل سوف أكون أكثر قدره على العطاء والتغير والتأثير الايجابى على من حولى

أحساس لسه حى الأصل فى ثباتى مهما رأيت من بهلونات
هم يعجبون فى الثابت بالرغم من أظهارهم العكس و لكن لا يستطيعون أن يكونو مثله من ضعفهم

دمت لى يا أحساس لسه فعلاً حى متألق مشرق

# posted by

فى القلب : November 28, 2007 at 8:38 AM

صباح الخير يا صاحبة القلب الكبير

ثمة نوعان من الموضوعات :,موضوع حين نريد التعليق عليه بنجد خواطرنا وافكارنا بتنساب بسهوله دون عناء تدبر او تخيل ..,وموضوع اخر كلماته قليله لكن معانيه في غاية العمق ,وده بيحتاج مننا قبل التعليق تدبر وتخيل في كلمات الموضوع ,وفي جمله وفي المعاني العميقه الموجوده فيه وهذا هو ما تمتاز به موضوعاتك يا مبدعه
----

الدنيا حبلي بالمتناقضات وبجد احيانا لما الواحد فينا بيقعد يفكر ويتأمل في هذه المتناقضات بيتعب وبيحتار ويقعد يسأل نفسه الدنيا دي ماشيه ازاي وهي لمين وعلي مين وغيرها من الاسئله اللي الواحد لو ترك ذهنه ليها مش هيلاقي نفسه..بس الواحد لما بيذكر ربنا بيرتاح وبيسيبها علي الله

تحياتي لكي يا صاحبة القلب الكبير وسلميلي علي ولادك

# posted by

rack-yourminds : November 28, 2007 at 10:14 AM

لو الاختلاف ما كانت الحياة
بس بجد جاي لأيه يابكرة دي مستني قوي قوي تفتكري جاي لينا ولا لحد غيرنا

# posted by

Anonymous : November 28, 2007 at 10:40 AM

أحنا أيه وفين ومين وأنت يا بكره جاى لأيه

احنا ايه ؟ ولا حاجة
فين؟ تايهين مش عارفين
مين؟ ؟؟؟؟؟؟
وانت يابكرة جاي ليه ؟ ؟؟؟؟؟؟؟
ايه الاسئله الصعبة دي
دي امتحانات الثانوية العامة اسهل من كده

# posted by

sahr : November 28, 2007 at 12:45 PM

صحيح وما الدنيا الا سرك كبير
ارب ارب ارب

تحياتى اليك
ابو مفراح

# posted by

ahmed mefrh : November 28, 2007 at 2:45 PM

تحيايي لاحساس الرائع والسطور البديع التي تلمس شغاف قلب كلا منا
بجد مبدعه
ولمحه الحزن اضفت عليها روعه
دمتي بخير

# posted by

مـحـمـد مـفـيـد : November 28, 2007 at 6:28 PM

الدنيا مزيج وخليط ... تعدد وشتات.. فيها من كل الأزواج...
وبضددها تتمايز الاشياء ...
وبالفعل فيها المصهور المقهور وفيها الطاغي المستكبر..

حلو التضاد الصوري بين ذي الدهب / ابن الخشب

جميل ما خطه قلمك..
دمت بكل ود

# posted by

اسامة يس : November 28, 2007 at 8:56 PM

عزيزتى اوشا
انتى جبتى من الاخر فعلا
وشرحتى حالنا كما هو واقع
ياااااه احنا ملخبطين قوى بجد
خالص تحياتى لكى وتقديرى

# posted by

رحــــيـل : November 28, 2007 at 10:24 PM

فكرتيني بالأغنية الجميلة اللي غناها محمود عبد العزيز في فيلم الكيت كات .. فاكراها؟

الزمن أزرق من زمان على فكرة .. دلوقت بقى كحلي

# posted by

يا مراكبي : November 28, 2007 at 11:28 PM

جميلتى
.

.

هو زمن يتسع للجميع
يتسع للتناقضات
يتسع لكل الألوان

لا تندهشى
أو تنزعجى من الغد

تقبّليه كما هو بجميع ألوانه
صدقينى
هو واقع

.
.

ف حبى واقعك
أو - على الأقل - تظاهرى بذلك

# posted by

Doaa Ebrahim Aaql : November 28, 2007 at 11:53 PM

يا سلام يا سلام
اي دة كلو
فن وشعر وفكر
دانتي غيبت دي عملت عندك حاجات وحجات
رجعت بحجات اجمل واعمق وكل مرة بتبهريني:)
بجد احييكي

# posted by

Lemonada : November 29, 2007 at 8:58 AM

صندوق الدنيا

مليان كراكيب

حلو البوست
كل الود .

# posted by

محمد العدوي : November 29, 2007 at 10:25 AM

اية الجمال دة
اغيب اغيب و اسئل عليك و اشوف ابدعاتك الرائعة في وصف الناس اشكال و الوان و اصناف
بوست رائع

# posted by

ابن رشد : November 29, 2007 at 5:28 PM

متهيألى انه زمن بلا لون
أو أنه كالحرباء يتلون بكل الألوان

دمتِ نقية
:)

# posted by

hoda omran : November 29, 2007 at 6:39 PM

هتشوف ألى بيهرب من لحظه حلوه ودافن عقله جوه التعب

هو فى حد كده فعلاً؟؟

سعيدة بمرورى تقبلى تحياتى

# posted by

Anonymous : November 29, 2007 at 6:51 PM

السلام عليكم ورحمة الله وبركاته
وأرب أرب أرب من الأخر هتشوف العجب
أسعدتينا ولكن لى ملحوظه صغيره
أحب أوضح شىء
قال الله عز وجل فى حديث قدسى ( يؤذينى ابن أدم يسب الدهر وأنا لدهر أقلب الليل والنهار) صدقاله العظيم
هذا من أجل العنوان
أتمنى أن أكون قد أفدت
والسلام عليكم ورحمة الله وبركاته

# posted by

مؤمنه : November 29, 2007 at 7:12 PM

اسلام عليكم
في مثل بيقول اللي يعيش ياما يشوف
والدنيا فيها نا كتير
وكل واحد بيحب يعيش بالطريقة اللي بيشوف انها صح
في واحد بيعيش علي كذا لون وواحد مجرد حلمة واقصي امنيه ليه انه يكون مستور

# posted by

son's egypt : November 30, 2007 at 12:41 AM

هتشوف إلى نفسه زى الدهب والدنئ أبن الخشب
هتشوف ألى بيهرب من لحظه حلوه ودافن عقله جوه التعب

التشبيهات فى الجملتين دول
اكثر من روعه

# posted by

horas : November 30, 2007 at 1:05 AM

بكره دايما احلى
حتى لو النهارده اصعب
ودايما بقول مستحيل نفضل فى ليل من غير نهار
والنهار قريب

# posted by

lonely : November 30, 2007 at 1:40 PM

يااااااااااااااه
بجد كلماتك على قلتها بس بجد تحفة
و بتوصل المعنى و الهدف بسهولة
فعلا زمن ازرق
ربنا يكون ف عونا أجمعين

تحياتى ليكى يا قمر

# posted by

Eman Eltaher : November 30, 2007 at 5:42 PM

يا اشعارك يا فنانة ....هههههههه

اية الشعر الجميل دة ... هو انا عايز اسالك سؤال لية كل الشباب اشعارهم بتعبر عن الضياع وافقدان الامل والتشتت كدة ؟! وهل دة نظرة تشاؤمية ولا الواقع والمجتمع ماثريين على الشباب ؟!

تحياتى

# posted by

مصطفى محمود : November 30, 2007 at 11:22 PM

ايه الكلام الكبير ده
انتى لخصتى انواع البشر ببراعه
تحياتى ليكى ومتغيبيش علينا كتير

# posted by

Unknown : December 1, 2007 at 1:51 AM

بجد كلامك تحفه واكتر من رائع انا عجبنى اوى الى نفسه زى الدهب والدنئ ابن الخشب ،الى بيهرب من لحظه حلوه ودافن عقله جوه التعب وبجد احنا كتير اوى بتعدي علينا لحظات حلوه بنتجاهلها وبنفكر فى الحاجات اللى تعبانه بس انتى كلامك فسر الناس بكل اشكال طبائعهم تحياتى ليكى
بس بكره هيجي وهيجى بينا لينا واكيد بكره احلى من انهارده

# posted by

tota_fm : December 1, 2007 at 2:26 AM

عن الاقنعة التى نرتديها و تلك التى نحلم بارتدائها ,,
تحفة !

# posted by

emz : December 1, 2007 at 8:01 PM

وأنت يا بكره جاى لأيه

mafish ay klama a2olo!

# posted by

~ Bato0ot ~ : December 1, 2007 at 8:47 PM

عايز اعرف يعني ايه النداشة
:))

# posted by

http://kasperb4.blogspot.com/ : December 1, 2007 at 11:47 PM

هتشوف ألى عامل أمير وراسم نفسه بالطباشير

حلوة اوي دي... اللي عايشين في خيالهم وعاملين هالة حواليهم من الفراغ والهوا وبيفتكروا ان العالم من غيرهم جحيم وانهم عباقرة زمانهم واذكياء عصرعم وماحدش يقدر يضحك عليهم
وفاكرين نفسهم حاجة وهما ولا حاجة
معلش اصلي حاساها اوي ومتغاظة اوي
:))

# posted by

Reema : December 2, 2007 at 8:48 AM

الغش طرطش رش
عالوش الوان بويه

معرفش مين بلياتشو
او مين حكيم

جعل الزمن وشى
مش زى اخويا

ضاعت وششنا
بين حرفين
غـــين و شــــين

البوست روعه وانتى اصلا حساسه ومنتهى منتهى الابداع
ياريتك تعملى بوست كل سعتين هاكون فى منتهى الانسجام
انتى المره دى لمسى مكان عندى محدش لمسه قبل كده
وطبعا كالعاده انتى رهيبه

تحياتى

# posted by

momken : December 2, 2007 at 10:06 AM

السيرك

دنيتنا اصبحت سيرك

وشوش ملونة

وبهلونات

ناس مش ممكن تكون ناس

وناس مداسة باقدام ناس

وناس نفسها تبقي ناس

سيرك كبير

اما بكرة جاي لايه

سيرررررررررك

يرده

تحياتي لبوستك لرائع كالمعتاد يا اوشا

وانتي بجد

في القلب دايما

# posted by

بنت الاسلام : December 2, 2007 at 12:30 PM

لماذا الياس
لماذا اللون الازرق بس
بكرة جاى و احلى من الامس
لماذا نزرع فى الاطفال البؤس
زمن الازرق ابيض
بااذن الله
تحياتى

# posted by

مدحت محمد : December 2, 2007 at 6:30 PM

في القلب
.
.
اعتقد ان من اسمك
يجب ان ابدا
.
.
.
اولا : مادام مافي القلب ابيض تبقي ذرة نور تشع حلم للامام
.
.
ولكن
ماطعم الحياه
اذا كان كل ما فيها له رائحة طيبة
كل مافيها له طعم التفاح
كل مافيها يشع جمالا ونضاره
.
.
اعتقد اني اصبحت لا اعيش الا بكتلة متناقضات الحياه والتي اعتدت دوما علي التعايش معها
.
.
يا دنيا يا غازية
الرقص ليه غيــّـه
لو مت .. فيه دية
ام هدر مي حلال ؟؟؟؟
.
.
تحياتي يا جميل والسلام

# posted by

admelmasry : December 2, 2007 at 9:22 PM

تصدقي فعلا أ،ا ساعات أشوف الدنيا برين

بر لو اتمشيتي فيه
تلاقي خير و ايمان و علم و حب

و بر لو مشيتي فيه
تلاقي خلاقة و قوانين مضروب بيها عرض الحائط وحقد و غل و كذب و ازدواج

تمشي هنا تحسي ان الدنيا خلاص ما فيهاش غيركده
وتمشي هنا تحسي برضه نفس الاحساس

بص لو تقفي في النص تلاقي البر اللي يخوف عمال يزحف بسرعة

ربنا يصلح أحوالنا

لمست في البوست سخرية لاذعة.. تلسع اللي حاطط هم الانسانية في باله

# posted by

Hannoda : December 3, 2007 at 11:30 AM

بجد علي اد بساطة الكلمات الا انها مؤثرة جدا جدا

فيها شجن يبكي

تحياتي ليكي يا اوشا

# posted by

Anonymous : December 3, 2007 at 11:40 PM

سيدي يا سيدي علي الدماغ العالية

هو دة الكلام
بس قوليلي من امتي الزمن بيجي لحاجة
طول عمرة بيجي علي ايه
ولايه

عادي بقي
علي راي مدون صاحبنا

# posted by

smraa alnil : December 4, 2007 at 12:03 AM

أوشا حبيبتى
تحياتى يا قلبنا
بصى يا ستى انا بقى طلعت فكيكة اوى
قرأت أرب أرب
على إنها تريقة ل عرب عرب
بلاش تضحكى على هااا
بعتذر عن سوء الفهم
وأنا اللى كنت بحسب كل ده
رمى كلام على اللى ما يتسموا حكامنا
بسبب إجتماع بيع الكرامة
بس صدقينى تنفع عليهم
الناس أنواع دى طبيعتها
و علينا أن نختار ما يتواءم معنا
بس يا ريت كل واحد يبين لونه الحقيقى
يا ريت
تحياتى و بعتذر عن سوء فهم

# posted by

Esmat : December 4, 2007 at 4:09 AM

احنا فين ومين وانت يا بكره جاى ليه جميله قوى منك الجمله دى وتحياتى لك على هده المقاله

# posted by

walaa : December 4, 2007 at 8:54 AM

زمن الالوان
يلون القدر حياتنا بما يشاء
ويسحق احلام الفقراء وتبقى احلامهم مجرد احلام
ولكن مع كل فجر جديد يصحى هذا الفقير من نومه سعيد فقد شاهد نفسه ليلة امس وزير

بوست رائع

RoReE

# posted by

Anonymous : December 4, 2007 at 2:25 PM

المشكله اني فاكره اني دخلت وعلقت

فين تعليقي

اطلعي بيه بالتي هيا احسن

بدل ما انكش في الادراج واقلب البوستات

ولو كلمه ضاعت كدا ولا كدا انا مش مسؤوله

بجد تسلم ايدك والله

انتي انسانه دماغك عاليه وحلوه في كل حاجه بصراحه

ربنا يبارك فيكي بجد يا قمر

وربنا يخلصنا من الي احنا فيه قريبا ان شاء الله

تحياتي ليك جدا

وداخله تاني عشان ادور علي التعغليق بتاعي

تحياتي ليكي

# posted by

gohayna : December 4, 2007 at 3:23 PM

رائع الوان واشكال وى على كل لون بنى ادمين الوان واحلام واوهام
بجد احترت اخد حته عجبانى

تحياتى

# posted by

ابو العربى : December 4, 2007 at 10:36 PM

ههههههه

دنيا العجائب فيها احنا عايشين

تحياتى

# posted by

Tamer Nabil Moussa : December 5, 2007 at 2:56 PM

بعد السلام والتحية
حابب أشكرك لأني قضيت وقت ممتع مع سطورك وذاب توتري في عذوبتهم

أولا أنا من عشاق الشعر العامي والزجل وبأحس بأنه يلامسنا بعمق; سطورك يا سيدتي جميلة وعميقة في معانيها

ثانيا السطر التالي; موتني من الضحك مافهمت منه ولا كلمة وكلماته غريبة وخارج معجم المصري بتاعي
:)

هتشوف البوغاشه هتشوف النداشه والبمبى الشفتشى

عارف إن لهجتنا أغرب و أصعب لكن السطر أعلاه نساني التكشيرة ههههههه

متشكر يا أفندم وربنا يرزقكم أحلى بكره

خالص تحياتي

# posted by

Anonymous : December 5, 2007 at 7:23 PM

اوشا
ايه الجمال دا
دايما وابدا متألقة ومبدعة
الكلمات رائعة
تحيااااتى

انا فتحت المدونة تانى
باركيييييلى

# posted by

Hadota ... حدوتة : December 6, 2007 at 7:03 PM

انا ليه
انا مين
انا ازاي
مش عارف امتب تعليق غير كده
الدنيا تقريبا كده و الله اعلم سيرك
الكبار جدا
الاجداد بيعيشوها في الطراوه و كانهم ادركوا فعلا حقيقتها
علشان كده فيهم احساس بالراحه

# posted by

ذو النون المصري : December 6, 2007 at 10:11 PM

جميلة والله الصورة قوى ومعبرة عن اللى انتى كاتباه

عاملالنا صندوق الدنيا ومليان كل الوشوش والمعادن من كل بستان جايبالنا وردة

جميل والله بس الواحد تعب من الوشوش بقى خالص - مبقيناش بنستحمل

وحشتينى والله
يارب تكونى بخير

تحياتى
هبة

# posted by

Doba : December 6, 2007 at 10:55 PM

و اللي يعيش ياما
ياما
يشوف
دنيا ليها العجب
دنيا زي البلياتشو
و كل واحد فينا مجرد اراجوز

بوست تحفة
كنت فين انا من زمان
تايهة عن الجمال ده
تحياااااااااتي

# posted by

angelic devil : December 7, 2007 at 10:41 AM

احنا مين

سؤال مؤلم

سلمت أناملك

تحياتي

# posted by

القلم السكندري : December 7, 2007 at 10:55 AM

هتشوف إلى نفسه زى الدهب والدنئ أبن الخشب
هتشوف ألى بيهرب من لحظه حلوه ودافن عقله جوه التعب

مممممممممممممم......عجبانى اوى

# posted by

vision : December 7, 2007 at 5:11 PM

وبعدين بقا
كل ما أعدى ألاقى الباب مقفول كده

وإيه التقل ده

كل ده غياب
ينفع كده يعنى
( غمزة )

هاهاهاهاها

****

سلام يا قمر

# posted by

Doaa Ebrahim Aaql : December 8, 2007 at 12:34 PM

مدونة رائعة
وبوست رائع
اتمنى نبقى اصحاب
واتمنى تزورنى
انا لسة جديدة فى عالم المدونات على فكرة
وبجد انت عندك احساس حلو اوى

# posted by

مروة الزارع : December 8, 2007 at 6:19 PM

اوشا ياغالية فين الجديد ياجميلة انا عارفة انك مشغولة مع الكمندوز بتوعك اعانك الله ياغالية واراح بالك

# posted by

truelove : December 9, 2007 at 10:43 AM

هتشوف إلى بيهرب من لحظه حلوه
ودافن عقله جوه التعب

انا ده والله يا اوشا

الجملة دى معبرة عنى بطريقة غريبة .. وانا كنت بفكر فى حالى وبقول مالى وقلت أفتح مدونتك وانا فى الشغل

ألاقى الجملة دى

أكثر من رائعة

أرق تحياتى

# posted by

Anonymous : December 9, 2007 at 12:34 PM

مكان فى القلب

Tuesday, November 27, 2007

زمن ...أزرق

About Me

<مود القلب>

<مخزن الأحاسيس القلبيه>

<قلب الوقت>

<بينورو القلب>

<بنارات القلب>

<وصلات عقل قلب>